2026 թվականի հունվարի 1-ից Հայաստանում փուլ առ փուլ ներդրվում է առողջության համընդհանուր ապահովագրությունը (ԱՀԱ)։ Բացատրում ենք առանց բարդ ձևակերպումների․ ով է արդեն համակարգում, ինչն է անվճար, ինչի համար են դեռ վճարում, և ուր գնալ ապահովագրությամբ։
≈1,8 մլն մարդ արդեն ապահովագրված է
2 800+ ծառայություն փաթեթում
500+ կլինիկա և 1 500+ դեղատուն հիմնադրամի ցանցում
Առողջության համընդհանուր ապահովագրության հիմնադրամի (uhif.am) և ՀՀ կառավարության տվյալները, 2026-ի սեպտեմբեր։
Ով է արդեն ապահովագրված
Համակարգը բնակիչներին ընդգրկում է փուլերով՝ ըստ տարիների։ Գտեք ձեր խումբը․
2026 թվականից
Արդեն համակարգում են
Մինչև 18 տարեկան երեխաները, ինչպես նաև առանց ծնողական խնամքի մնացած անձինք՝ մինչև 23 տարեկան (առկա ուսուցմամբ սովորելու դեպքում՝ մինչև 26 տարեկան)
65 և բարձր տարիքի մարդիկ
Հաշմանդամություն ունեցող անձինք (ֆունկցիոնալության նոր գնահատում չանցածները՝ առայժմ մինչև 2028 թվականի հունվարի 1-ը)
Հաշմանդամություն ունեցող երեխայի ծնողներից մեկը, որդեգրողը, խնամակալը կամ հոգաբարձուն՝ հիմնադրամին դիմում ներկայացնելու դեպքում
Սոցիալապես անապահով ընտանիքները՝ նպաստառուները և այն ընտանիքները, որոնց եկամուտը ցածր է նպաստի իրավունք տվող սահմանային շեմի 130 տոկոսից
Զոհված և անհայտ կորած զինծառայողների ընտանիքները
Հայրենական մեծ պատերազմի վետերանները և նրանց հավասարեցված անձինք, բռնադատվածները
Հաշմանդամության զինվորական կենսաթոշակ ստացող նախկին զինծառայողները
Չեռնոբիլի ատոմակայանի վթարի վերացման աշխատանքների մասնակիցները
Գոնե մեկ գործատուից ամսական 200 001 դրամ և ավելի աշխատավարձ ստացող վարձու աշխատողները, ինչպես նաև 2025 թվականի համար 2,4 մլն դրամից ավելի համախառն եկամուտ ունեցող ԱՁ-ները և նոտարները՝ տարեկան ապահովագրավճարը վճարելուց հետո
Այս բոլոր խմբերի համար, բացի աշխատողներից, ապահովագրավճարն ամբողջությամբ վճարում է պետությունը։ 200 001–500 000 դրամ աշխատավարձ ստացողների համար 2026 թվականին բյուջեն ամսական լրացնում է 6 000 դրամ (բացի սոցիալական փաթեթի շահառուներից)։ Ավելի բարձր աշխատավարձի դեպքում բյուջեն չի լրացնում, իսկ ԱՁ-ներն ու նոտարները տարեկան ապահովագրավճարն ամբողջությամբ վճարում են ինքնուրույն։
2027 թվականից
Միանում են հաջորդը
Մինչև 200 000 դրամ աշխատավարձ ստացող աշխատողները
Քաղաքացիաիրավական պայմանագրերով աշխատողները
Տաքսու վարորդները, որոնք միացել են հարկային մարմնի էլեկտրոնային համակարգին և ամեն պատվերի դեպքում տրամադրում են ՀԴՄ էլեկտրոնային կտրոն, կամ որոնք ուղևորափոխադրումներն իրականացնում են ուղևորափոխադրման ծառայության էլեկտրոնային հարթակի միջոցով
Տարեկան մինչև 2,4 մլն դրամ համախառն եկամուտ ունեցող ԱՁ-ները և նոտարները
Վարձակալական վճար, տոկոս, շահաբաժին, ռոյալթի ստացողները, եթե դրանց հանրագումարը տարեկան կազմում է 2,4 մլն դրամ և ավելի
Կամավոր կարգով՝ ապահովագրված վարձու աշխատողի, ԱՁ-ի կամ նոտարի չաշխատող ծնողները, ամուսինը և զավակները․ նրանց լրիվ ապահովագրավճարը վճարում է ինքը կամ իր գործատուն
Թե 2027 թվականից որքան են վճարելու մինչև 200 000 դրամ աշխատավարձ ստացողները, դեռ որոշված չէ։ Առողջապահության նախարարությունը հանրային քննարկման է դրել օրենքի նախագիծ (2026 թվականի սեպտեմբերի 14–29)․ ամսական 2 000 դրամ՝ աշխատավարձից, գործատուն և բյուջեն՝ 4 400-ական դրամ։ Նախագիծը դեռ ընդունված չէ։
2028 թվականից
Վերջին փուլ
Գյուղատնտեսական անհատական գործունեությամբ զբաղվողները (ազդակիր բնակավայրի կարգավիճակ ունեցող բնակավայրերում՝ արդեն 2027 թվականից), իսկ նրանց ընտանիքի անդամները՝ կամավոր կարգով, լրիվ ապահովագրավճարով
Մինչև երկու տարեկան երեխա խնամող մայրերը (որդեգրողները)
Ընտանիքում երեք կամ ավելի անչափահաս երեխաների խնամք իրականացնող ծնողներից (խնամակալներից) մեկը՝ հիմնադրամին դիմում ներկայացնելու դեպքում
Մինչև երկու տարեկան երեխա խնամող մայրերի և բազմազավակ ծնողների համար ապահովագրավճարը վճարում է պետությունը, իսկ գյուղատնտեսությամբ զբաղվողները վճարում են ինքնուրույն։ Կառավարության նպատակն է, որ 2029 թվականի հունվարի 1-ի դրությամբ բնակչության բոլոր շերտերը ներառված լինեն համակարգում․ հիմնադրամի գնահատմամբ՝ ապահովագրված կլինի բնակչության շուրջ 95%-ը։ «Մնացած բոլորը» առանձին խումբ օրենքում չկա․ ոչ մի խմբում չընդգրկվածների համար պետությունը հատուցում է բժշկական օգնության և սպասարկման նվազագույն ծավալը, այդ թվում՝ շտապ օգնությունը ՀՀ քաղաքացիների համար։
Համակարգում ընդգրկվելը կախված է քաղաքացիությունից, ռեզիդենտությունից և եկամտի տեսակից։ Արտոնյալ խմբերը, որոնց համար վճարում է պետությունը, նախատեսված են ՀՀ քաղաքացիների համար, որոնք վերջին 12 ամսվա ընթացքում Հայաստանում գտնվել են 183 և ավելի օր (մինչև մեկ տարեկան երեխաների համար բավական է քաղաքացիությունը)։ Բնակվելու իրավունք (կացության կարգավիճակ) ունեցող օտարերկրացիներն ապահովագրված են, եթե աշխատում են որպես վարձու աշխատող, ԱՁ կամ նոտար։ 2026 թվականի մայիսի 8-ից այս կանոնը տարածվում է նաև ապաստան հայցողների և Հայաստանի Հանրապետությունում ապաստան ստացած փախստականների վրա, որոնք ընդգրկված են նույն խմբերում։ Ոչ ստանդարտ իրավիճա՞կ՝ աշխատանք արտերկրում, մի քանի եկամտի աղբյուր։ Ճշտեք ձեր դեպքը հիմնադրամում՝ 8866 կարճ համարով։
Ինչպես հասկանալ, որ դուք համակարգում եք
Ստուգումը տևում է մի քանի րոպե՝ ArMed պետական էլեկտրոնային առողջապահության հարթակի միջոցով։
1Տեղադրեք ArMed eHealth հավելվածը կամ բացեք armed.am կայքը
2Առաջին մուտքի ժամանակ գրանցվեք․ անհրաժեշտ են ՀԾՀ-ն (սոց. քարտի համարը), ծննդյան ամսաթիվը և հեռախոսահամարը (եթե նախկինում բուժհաստատություն այց եք ունեցել՝ այցի ժամանակ տրամադրած համարը)։ Կարող եք մուտք գործել նաև նույնականացման քարտով։ Տվյալները կբեռնվեն պետական ռեգիստրից, և կմնա հաստատել համաձայնությունը (ակտիվացնել վկայագիրը)
3Բացեք ապահովագրության բաժինը․ այնտեղ են ձեր կարգավիճակը, ծառայությունների ու դեղերի փաթեթը
4Չի՞ ստացվում մուտք գործել։ ArMed-ի բաժանորդների սպասարկման կենտրոնն աշխատում է շուրջօրյա՝ +374 11 20 20 33։ Ապահովագրության հարցերով դիմեք հիմնադրամին՝ 8866 համարով կամ support@uhif.am հասցեով, կամ ձեր պոլիկլինիկայի ընտանեկան բժշկին․ նրանք տեսնում են ձեր կարգավիճակը և կօգնեն ակտիվացնել վկայագիրը
Շատերին համակարգն ընդգրկում է ավտոմատ՝ պետական տեղեկատվական բազաների տվյալներով։ Մնում է ակտիվացնել վկայագիրը՝ ArMed հավելվածում կամ պոլիկլինիկայի օգնությամբ։ Անկախ սմարթֆոնի առկայությունից՝ ապահովագրվածներն արդեն գրանցված են ապահովագրության ռեգիստրում, որտեղ վարվում է նրանց էլեկտրոնային վկայագիրը։
Ինչն է ծածկվում և ինչը՝ ոչ
Ներառված է փաթեթում
Ընտանեկան բժշկի, թերապևտի, մանկաբույժի ընդունելություններ․ ձեր մուտքը համակարգ
Նեղ մասնագետների խորհրդատվություններ՝ ուղեգրով․ կյանքում առաջին անգամ հայտնաբերված հիվանդության դեպքում՝ տարեկան մինչև 2 խորհրդատվություն յուրաքանչյուր նեղ մասնագետի մոտ, քրոնիկ հիվանդությունների դեպքում՝ տարեկան մինչև 4 այց (առանձին հիվանդությունների դեպքում՝ ավելի)
Կանխարգելում․ մամոգրաֆիա (45–68 տարեկան կանանց համար) և ՄՊՎ թեստ (30–60 տարեկան)՝ առանց ուղեգրի, հիմնադրամի ցանկում ընդգրկված կազմակերպություններում, ինչպես նաև մեծահասակների կանխարգելիչ այց 18–75 տարեկանների համար՝ 2 տարին մեկ, ձեր ընտանեկան բժշկի մոտ
Հղիության վարում
Հոգեկան առողջության օգնություն
Փաթեթում ընդհանուր առմամբ ավելի քան 2 800 ծառայություն է։ Ձեր կարգավիճակի ճշգրիտ ցանկը՝ ArMed-ում և հիմնադրամի uhif.am կայքում։
Ներառված չէ․ վճարում եք ինքներդ
Մեծահասակների ստոմատոլոգիա․ ապահովագրությունը հատուցում է միայն անհետաձգելի օգնությունը՝ զննում և ատամի հեռացում, իսկ բուժումը, իմպլանտները և օրթոդոնտիան՝ ձեր հաշվին։ Բացառություններ․ մինչև 18 տարեկաններին ապահովագրությամբ բուժում և հեռացնում են ատամները, 6 և 12 տարեկանում կատարում են կանխարգելիչ զննում, իսկ կծվածքի խնդիրների դեպքում՝ օրթոդոնտի խորհրդատվություն․ 65 և բարձր տարիքի անձանց հասնում է ատամների պրոթեզավորում (բացի իմպլանտներից, կերամիկական, մետաղակերամիկական և ցիրկոնե անշարժ պրոթեզներից և մասնակի բյուգելային պրոթեզներից)․ հղիներին՝ ստոմատոլոգի կանխարգելիչ այց։ Գտնել ատամնաբույժ
Բժշկի կանչը տուն․ բացի այն դեպքերից, երբ պացիենտը ֆիզիկապես չի կարող այցելել պոլիկլինիկա։ Անհետաձգելի վիճակներն այլ բան են․ զանգահարեք 103։ Ապահովագրված անձանց համար շտապ օգնությունը (տարեկան մինչև 8 կանչ) հատուցում է ապահովագրությունը, իսկ չապահովագրված ՀՀ քաղաքացիների համար՝ պետությունը։ Անհետաձգելի օգնություն․ ում զանգահարել
Կոսմետոլոգիա և գեղագիտական նպատակով պլաստիկ վիրահատություններ։ Վերականգնողական վիրահատությունները ներառված են փաթեթում՝ օրգան համակարգերի ֆունկցիաները վերականգնելու համար կամ ապահովագրվելուց հետո տեղի ունեցած դժբախտ պատահարի դեպքում
Համավճարներ․ որոշ խորհրդատվությունների և ծառայությունների համար կլինիկան գանձում է ֆիքսված համավճար՝ ոչ ավելի, քան հիմնադրամի սակագնի կրկնակին, դրա չափը նշված է uhif.am կայքում։ Հիմնադրամի պարզաբանմամբ՝ եթե բժիշկն աշխատում է համավճարով, կլինիկան պետք է առաջարկի նաև առանց համավճարի աշխատող բժիշկ։ Մասնակի ծածկվող դեղի դեպքում տարբերությունը վճարում է պացիենտը։ Երևանի լաբորատորիաները
Ցանկը սպառիչ չէ․ այն ամենը, ինչ հաստատված փաթեթից դուրս է, վճարվում է առանձին։ Վճարովի պրոցեդուրայից առաջ հարցրեք կլինիկային՝ ծառայությունը ներառվա՞ծ է ապահովագրության մեջ, և ստուգեք ցանկը ArMed-ում։
Ուր գնալ ապահովագրությամբ
Առաջին կետը ձեր պոլիկլինիկան է․ ընտանեկան բժիշկը կամ թերապևտը, որին կցված եք։ Նա բուժում է ինքը կամ տալիս է ուղեգրեր՝ մասնագետների մոտ, անալիզների, հիվանդանոց։ Պլանային բուժօգնությունն առանց ուղեգրի ապահովագրությունը չի հատուցում։ Առանց ուղեգրի կարելի է դիմել․ անհետաձգելի վիճակների դեպքում, սքրինինգների համար (մամոգրաֆիա, ՄՊՎ թեստ), ստոմատոլոգի մոտ, հղիության ընթացքում և քրոնիկ հիվանդության դեպքում, եթե ընտանեկան բժիշկն արդեն ախտորոշել է հիվանդությունը։
1Գրանցվեք ձեր թերապևտի մոտ՝ պոլիկլինիկայի հեռախոսով կամ ArMed-ով (առցանց հերթագրումն աշխատում է, եթե պոլիկլինիկան այնտեղ մուտքագրել է իր աշխատաժամերը)
2Եկեք ընդունելության․ բժիշկը կզննի և կորոշի հաջորդ քայլերը
3Ստացեք ուղեգրեր՝ անալիզների, նեղ մասնագետների, դեղերի դեղատոմսեր
4Ուղեգրով գնացեք համակարգի մասնակից ցանկացած կազմակերպություն
5Դեղատոմսով դեղերը ստացեք գործընկեր դեղատներում
Հիմնադրամի հետ աշխատում են ավելի քան 500 կլինիկա և հիվանդանոց՝ և՛ պետական, և՛ մասնավոր, ինչպես նաև ավելի քան 1 500 դեղատուն (հիմնադրամի ցանկով՝ 2026 թվականի սեպտեմբերի 29-ի դրությամբ)։ Medaro-ի կատալոգում այդ կլինիկաները նշված են «Ընդունում է պետական ապահովագրությամբ» նշանով։
Տարեկան ապահովագրավճարը բոլորի համար նույնն է՝ 129 600 դրամ (ամսական 10 800), և այն կարող է փոխվել միայն օրենքով։ Շատերը ինքնուրույն վճարելու կարիք չունեն․ երեխաների, 65+ տարիքի մարդկանց, հաշմանդամություն ունեցողների, զոհված զինծառայողների ընտանիքների և այլ արտոնյալ խմբերի համար ապահովագրավճարն ամբողջությամբ վճարում է պետությունը։ Աշխատողների ապահովագրավճարը պահում է գործատուն, իսկ 200 001–500 000 դրամ աշխատավարձի դեպքում 2026 թվականին բյուջեն ամսական լրացնում է ևս 6 000 դրամ․ մանրամասները՝ հաջորդ հարցում։
Ես աշխատում եմ։ Որքա՞ն եմ վճարում և ի՞նչ պետք է անեմ
Եթե գոնե մեկ գործատուից աշխատավարձը ամսական 200 001 դրամ և ավելի է, դուք համակարգում եք 2026 թվականից։ Ապահովագրավճարը պահում է գործատուն՝ ամսական 4 800 դրամ մինչև 500 000 դրամ աշխատավարձի դեպքում և ամբողջական 10 800 դրամ՝ ավելի բարձրի դեպքում։ Միաժամանակ նվազեցվել է Զինապահ հիմնադրամին վճարվող դրոշմանիշային վճարը, ուստի ընդհանուր պահումներն աճել են ավելի քիչ․ 200 001–500 000 դրամ աշխատավարձի դեպքում՝ 300 դրամով (ևս 6 000 դրամ լրացնում է բյուջեն), 500 001–1 000 000 դրամի դեպքում՝ 3 300 դրամով։ 1 մլն դրամից բարձր աշխատավարձի դեպքում դրոշմանիշային վճարը չի նվազեցվել, և աշխատավարձից պահվում է ամբողջ 10 800 դրամը։ Սոցիալական փաթեթի շահառուները մինչև 500 000 դրամ աշխատավարձի դեպքում ևս 6 000 դրամ վճարում են ինքնուրույն․ բյուջեն նրանց համար չի լրացնում։ Ավել պահված ապահովագրավճարը վերադարձվում է uhif.am կայքում ներկայացված էլեկտրոնային դիմումով, օրինակ՝ եթե ունեք հաշմանդամություն, բայց գործատուն պահում է կատարել։ Այս գումարները սահմանված են 2026 թվականի համար, իսկ թե ինչպես կլինի 2027-ին, դեռ քննարկվում է։ Մնացած աշխատողները ոչինչ անելու կարիք չունեն․ պարզապես ստուգեք կարգավիճակը ArMed-ում։ Մինչև 200 000 դրամ աշխատավարձերը միանում են 2027 թվականից։
Ես 63–64 տարեկան եմ։ Ապահովագրվա՞ծ եմ
Տարիքով՝ դեռ ոչ․ պետությունն ապահովագրում է 65 տարեկանից, իսկ կենսաթոշակային տարիքը 63 է։ 2026 թվականի հունիսի 25-ին վարչապետը հայտարարել է, որ հաջորդ փուլում առաջնահերթ կարգով համակարգում կներառվեն 63 տարեկան թոշակառուները, սակայն 2026 թվականի սեպտեմբերի վերջի դրությամբ օրենքում փոփոխություն չկա, և ժամկետ սահմանված չէ։ Դուք արդեն ապահովագրված եք, եթե գոնե մեկ գործատուից ստանում եք 200 001 դրամ և ավելի աշխատավարձ, ունեք հաշմանդամություն, կամ ձեր ընտանիքը ստանում է անապահովության նպաստ։ 2027 թվականից՝ նաև ցանկացած պաշտոնական աշխատավարձի կամ քաղաքացիաիրավական պայմանագրի դեպքում, իսկ աշխատող որդին, դուստրը կամ ամուսինը կկարողանան կամավոր վճարել ձեր ապահովագրությունը։ Կարգավիճակը ստուգեք ArMed-ում կամ 8866 համարով։
Ես ունեմ մասնավոր ապահովագրություն։ Այն փոխարինո՞ւմ է պետականին
Ոչ։ ԱՀԱ-ն պարտադիր է․ մասնավոր ապահովագրության առկայությունը վճարից չի ազատում։ Մասնավոր փաթեթներն աշխատում են «վրայից»՝ արագություն և հարմարավետություն, ստոմատոլոգիա, պետական փաթեթից դուրս ծառայություններ։ Հիմնադրամն ունի գործընկեր ապահովագրական ընկերություններ, որոնք առաջարկում են լրացուցիչ փաթեթներ․ ցանկը՝ uhif.am կայքում։
Նեղ մասնագետի համար ուղեգիր պե՞տք է
Որպես կանոն՝ այո․ այն տալիս է ընտանեկան բժիշկը կամ թերապևտը։ Առանց ուղեգրի կարելի է դիմել անհետաձգելի վիճակների դեպքում, սքրինինգների համար, ստոմատոլոգի մոտ, հղիության ընթացքում և քրոնիկ հիվանդության դեպքում, եթե ընտանեկան բժիշկն արդեն ախտորոշել է հիվանդությունը։ Ապահովագրությունը հատուցում է յուրաքանչյուր նեղ մասնագետի մոտ տարեկան մինչև 2 խորհրդատվություն նոր հիվանդության դեպքում և մինչև 4 այց՝ քրոնիկ հիվանդության դեպքում։ Որոշ բժիշկների մոտ կա ֆիքսված համավճար․ հիմնադրամի պարզաբանմամբ՝ կլինիկան պետք է առաջարկի նաև առանց համավճարի աշխատող բժիշկ։
Պե՞տք է գնալ կանխարգելիչ այցի
Այո, և դա կարևոր է ապագայի համար։ Օրենքի համաձայն՝ 2029 թվականին ապահովագրական փաթեթից կկարողանան օգտվել միայն նրանք, ովքեր 2026–2028 թվականներին ստացել են կանխարգելիչ ծառայություն (օրինակ՝ եղել են կանխարգելիչ այցի ընտանեկան բժշկի մոտ) կամ հերթագրվել են դրա համար։ Շտապ և անհետաձգելի բժշկական օգնությունը տրամադրվում է ամեն դեպքում։ Հերթագրվեք կանխարգելիչ այցի ձեր ընտանեկան բժշկի մոտ․ այն ներառված է ապահովագրության մեջ։
Կլինիկան մերժել է անվճար ծառայությունը։ Ի՞նչ անել
Նախ ստուգեք ArMed-ում կամ uhif.am կայքում՝ ծառայությունը ձեր փաթեթում կա՞, կլինիկան հիմնադրամի հետ պայմանագիր ունի՞, և արդյոք չի սպառվել խորհրդատվությունների սահմանաչափը (նոր հիվանդության դեպքում՝ տարեկան 2 խորհրդատվություն մեկ մասնագետի մոտ, քրոնիկի դեպքում՝ 4)։ Եթե ամեն ինչ համապատասխանում է, բայց օգնությունը մերժել են, հայտնեք հիմնադրամին՝ 8866 կամ support@uhif.am․ հիմնադրամը քննում է նման դիմումները։
Էջի տեղեկատվությունը տեղեկատու բնույթի է և չի փոխարինում հիմնադրամի կամ իրավաբանի խորհրդատվությունը։ Համակարգը նոր է և դեռ կարգավորվում է․ կանոնները, վճարներն ու ծառայությունների ցանկերը կարող են փոխվել։ Ձեր իրավիճակի ճշգրիտ պայմանները ճշտեք Առողջության համընդհանուր ապահովագրության հիմնադրամում՝ 8866 կարճ համար, uhif.am կայք, և ArMed հավելվածում։
Փաստերը ստուգված են օրենքի և կառավարության որոշումների տեքստերով (arlis.am), հիմնադրամի կայքով (uhif.am), ՀՀ առողջապահության նախարարության պարզաբանումներով, e-draft.am-ում հրապարակված օրենքի նախագծով, ինչպես նաև Armenpress-ի, Hetq-ի և հայաստանյան այլ լրատվամիջոցների հրապարակումներով։ Էջը թարմացվել է 29 սեպտեմբերի, 2026 թ.
